Melbourne

Daar is dae

wanneer ek stil word

my siel het ek iewers verloor

tussen ronde rotse

en 'n blaar-blink see

tussen die note van 'n houtfluit

wat deur die verstrengelde bome verdwaal

note wat seediere in die dieptes laat roer.

Daar is nagte

wanneer ek wakker word

my hart het iewers agtergebly

in die hartklop van 'n warm herfsnag

voel ek nog die hitte

van jou tong teen my keel

my liggaam is so leeg

gelos.

Mandi Axmann, 1997